Rajinder Manchanda Bani
aaj to rone ko ji ho jaise
phir koi aas bandhi ho jaise
shahr men phirta huun tanha tanha
ashna ek vahi ho jaise
har zamane ki sada-e-ma.atub
mere siine se uThi ho jaise
ḳhush hue tark-e-vafa kar ke ham
ab muqaddar bhi yahi ho jaise
is tarah shab ga.e TuuTi hai umiid
koi divar giri ho jaise
yas-alud hai ek ek ghaḌi
zard phulon ki laḌi ho jaise
main huun aur vada-e-farda tera
aur ik umr paḌi ho jaise
be-kashish hai vo nigah-e-sad-lutf
ik mohabbat ki kami ho jaise
kya ajab lamha-e-gham guzra hai
umr ik biit ga.i ho jaise
Leave a Reply