Jo Kar Ke Rafu Pairahan Nachte Hain

jo kar ke rafū pairahan nāchte haiñ

chhupāne ko dard-e-kuhan nāchte haiñ

zarā bhī nahīñ fikr sūd-o-ziyāñ kī

sar-e-dār kyā bāñkpan nāchte haiñ

huā tazkira jo tire gesuoñ kā

mire saath ahl-e-suḳhan nāchte haiñ

matā-e-safar lauT kar qāfiloñ kī

bhare dasht meñ rāhzan nāchte haiñ

tire narm hoñToñ kī hiddat meñ ‘shāfī’

shagufta shagufta saman nāchte haiñ

Leave a Comment