Lafzon Ke Khel

Azra Abbas

lafzon ke khel bahut ajiib hote hain

kabhi asaman par le jaate hain

aur kabhi zamin par de marte hain

ye kapdon ke rangon se ziyada

kabhi bahut gahre

kabhi bahut halke

suron men

dhime dhime

khuun sairab karte hain

aur kabhi ek ek qatra nichod lete hain

ye aram-deh bistar par ham se ham-bistari karte hain

aur kabhi hamari anval naal se chipak jaate hain

aur jab tak ham zinda rahte hain

ye hamen loriyan dete hain

aur kabhi hamen achanak mar jaane par

majbur karte hain

aur ye lafz hi elaan karte hain

ki kis jagah kis tarikh ko

ham kahan murda halat men paae gae