Hamida Shahin
da.era sa ajiib tha ghar men
ghuum jaati rahi sada ghar men
ek men tha ḳhuda ka kuchh saman
dusra taaq tha mira ghar men
kuchh kitaben hain aur kuchh yaden
in charaghon se hai ziya ghar men
ghar ne vo din bhi dekh rakkhe hain
kuchh nahin tha mire siva ghar men
us ko manzil bhi ham samajhte hain
aa raha ho jo rasta ghar men
jab bujha.i koi lagi ham ne
har taraf se dhuan uTha ghar men
umr bhar ḳhud ko zer-e-pa rakkha
aa.ina tha bichha hua ghar men
bag men us ne bhar liye va.ade
ek main ne bhi rakh liya ghar men
jis ki ḳhatir ye dil uTha ghar se
us ne phir la ke rakh diya ghar men
bha.iyon men fasad lazim tha
taḳht tha aur taaj tha ghar men
Leave a Reply