ahmad-nadeem-qasmi

Agar Hai Jazba-E-Tamir Zinda

agar hai jazba-e-tamir zinda

to phir kis chiiz ki ham men kami hai

jahan se phuul tuuta tha vahin se

kali si ik numayan ho rahi hai

jahan bijli giri thi ab vahi shakh

nae patte pahan kar tan gai hai

khizan se ruk saka kab mausam-e-gul

yahi asl-e-usul-e-zindagi hai

agar hai jazba-e-tamir zinda

khanDar se kal jahan bikhre pade the

vahin se aaj aivan uth rahe hain

jahan kal zindagi mabhut si thi

vahin par aaj naghme gunjte hain

ye sannate se li hai samt-e-hijrat

yahi asl-e-usul-e-zindagi hai

agar hai jazba-e-tamir zinda

to phir kis chiiz ki ham men kami hai

rahe yakh-bastagi ka khauf jab tak

shuaen barf par larzan rahengi

na dhire jam nahin paenge jab tak

charaghon ki laven raqsan rahengi

bashar ki apni hi taqdir se jang

yahi asl-e-usul-e-zindagi hai

agar hai jazba-e-tamir zinda

to phir kis chiiz ki ham men kami hai

More Poems

Leave a Comment