Athar Nafees
kya vaqt paḌa hai tire ashufta-saron par
ab dasht men milte nahin milte hain gharon par
pahchan lo is ḳhak-e-rah-e-hirs-o-havas ko
qadmon se ye uThti hai to girti hai saron par
ḳhud apne hi andar se ubharta hai vo mausam
jo rang bichha deta hai titli ke paron par
saughat samajhte the jise dasht-e-vafa ki
vo ḳhaak bhi sajti nahin ab apne saron par
ubhra na tira husn-e-ḳhad-o-ḳhal abhi tak
tasvir tiri qarz hai tasvir-garon par
kanTe bhi chune raah ke patthar bhi haTa.e
manzil na hui sahl magar ham-safaron par
phir pakke makanon ke makin ḳhanda-ba-lab hain
yalghar hai dariyaon ki phir kachche gharon par
Leave a Reply