Noor Bijnauri
yahan kisi ne charagh-e-vafa jalaya tha
tabhi ye gham-kada-e-dil bhi jagmagaya tha
junun ki shoḳh adaon ne faash kar hi diya
vo ek raaz ḳhirad ne jise chhupaya tha
shab-e-bahar ki shahzadiyo! ḳhabar hai tumhen
abhi abhi koi nashad muskuraya tha
sulag rahi hain umangen to sochta huun main
bahut hi ḳhushk tiri zulfon ka narm saaya tha
ye mahtab se kis ne mujhe sada di thi
ye kaun duur se mere qarib aaya tha
Leave a Reply