Syed Aabid Ali Aabid
dil hai a.ina-e-hairat se do-char aaj ki raat
gham-e-dauran men hai aks-e-gham-e-yar aaj ki raat
koi mansur se ja kar ye kaho ham-nafaso
huun ba-ta.azir-e-ḳhamoshi sar-e-dar aaj ki raat
gham ke mehvar pe hain Thahre hue aflak-o-nujum
meri mahfil men nahin vaqt ko baar aaj ki raat
na makan aaj hai sabit na zaman hai sayyar
na ḳhizan sho.abada-ara na bahar aaj ki raat
kabhi firdaus-e-gul-o-lala thi jo kisht-e-ḳhayal
us se be-saḳhta ugte hain sharar aaj ki raat
bu-e-ḳhun aati hai sahra-e-tamanna se mujhe
khelta huun dil-e-vahshi ka shikar aaj ki raat
tujhe malum hai ‘abid’ ki bayaz dil par
naḳhun-e-gham ne kiye naqsh-o-nigar aaj ki raat
Leave a Reply