har ek ḳhaliya ko a.ina ghar banate hue
bahut baTa huun badan mo’tabar banate hue
mere nuzul men saat asman ki gardish hai
utar raha huun dilon men bhanvar banate hue
adam ki rag men jo ik lahar hai vahin se kahin
guzar gaya huun safar muḳhtasar banate hue
miri hatheli pe Thahra hai irtiqa ka bahao
jahan ki ḳhaak se apna khanDar banate hue
ki do jahan ke isbat main ne phunke hain
tere sadaf men nafi ka guhar banate hue
jaga.un kis ke manazir ufuq ki ankhon men
ki main hi ḳhvab hua huun nazar banate hue
‘riyaz’ phir se bhaTakta hai jugnuon ki tarah
kisi ki raat men dil ko sharar banate hue
Leave a Reply