har ek jism mira hai, har ek jaan miri
ye khal-o-khad mire apne, ye an-ban miri
sitam to ye hai ki mazlum main huun zalim main
har ek zakhm mujhi se hisab mangega
har ek daagh miri astin se jhankega
hazar-ha miri peshaniyon ke chand bujhe
hazar-ha mire lab ham-kanar-e-zahr hue
hazar-ha mire jismon ki daliyan tutin
hazar-ha miri ankhon ki mishalen dubin
jahan pe aag lagi hai, vahan khilaune the
jahan pe khaak udi hai, vahan pe jhule the
jahan pe sard hain siine vahan pe chaukhat thi
jahan pe band hain ankhen vahan dariche the
main is dhuen men kahan apni laash ko dhundun
main is hujum men kaise shumar-e-zakhm karun
sitam to ye hai ki mazlum main huun, zalim main
har ek zakhm mujhi se hisab mangega!
har ek daagh miri astin se jhankega
Leave a Reply