siyah shab ki balaon ke haath lag ga.e the
mire charagh havaon ke haath lag ga.e the
vo le ke katranen guḌiya banane lag ga.i thi
ki shahr-zadi ko gaanv ke haath lag ga.e the
hamari maut yaqini bata.i ja rahi thi
hamare ḳhat bhi ḳhudaon ke haath lag ga.e the
hamare jism ki ghoḌon ki Tapon men paḌe the
hamare sar ki sinaon ke haath lag ga.e the
zamin-zade zamin se laḌa.i karne lage
ki un ke zehn ḳhalaon ke haath lag ga.e the
hamari ankhen nazaron men qaid ho ga.iin thiin
hamare kaan sadaon ke haath lag ga.e the
hamari rangaten har aan piili paḌ rahin thiin
hamari dhuup ko chhanv ke haath lag ga.e the
hamari shaḳhon pe bas ḳhaar bach ga.e the ‘safir’
hamare phuul ḳhizaon ke haath lag ga.e the
Leave a Reply