tujh ko likhna hai to aisa koi saf.ha likh de
jagte lafzon men ḳhvabon ka sarapa likh de
pahle jo shakl nahin dekhi thi vo samne la
pahle jo naam kitabon men nahin tha likh de
gumbad-e-shab men mah-o-najm sajane vaale
un gali kuchon ki qismat men daricha likh de
in likhe lafzon men likh muzhda na.e mausam ka
kahin mahtab kahin gul kahin chehra likh de
zard shaḳhon men na.i konplen likhne vaale
peḌ se TuTte patton ka bhi nauha likh de
yuun bhi tartib de qissa kabhi fasl-e-gul ka
baagh men sham.a jala taaq men sabza likh de
khinch de ḳhat na.i sub.hon ke ufuq-ta-ba-ufuq
ḳhak-tiro ke muqaddar men ujala likh de
khol de ankhon pe darvaza-e-hairat ‘qaisar’
harf-e-pinhan ke ma.ani sar-e-parda likh de
Leave a Reply