ik ḳhanuman-ḳharab ki daulat kahen jise
vo dard dil men hai ki mohabbat kahen jise
rana.i-e-ḳhayal ke qurban ja.iye
surat hai vo nazar men haqiqat kahen jise
dard-e-firaq-e-yar ki majburiyan baja
itna to ho na shor qayamat kahen jise
de sakta ho to de mujhe dad-e-sitam-kushi
ya vo suluk kar ki adavat kahen jise
lazzat-kash-e-nazara hai teri nazar to kya
itni to be-ḳhudi ho ki hairat kahen jise
baaqi kahan se ‘raz’ zamane men aj-kal
vo husn-e-dil-navaz mohabbat kahen jise
Leave a Reply