muntazir ankhen hain meri shaam se
sham.a raushan hai tumhare naam se
chhin leta hai sukun shohrat ka shauq
is liye ham rah ga.e gumnam se
sach ki ḳhatir jaan jaati hai to jaa.e
ham nahin Darte kisi anjam se
apne man ki baat ab kis se kahun
aa.ina naraz hai kal shaam se
kya ajab duniya hai ye duniya yahan
log milte hain magar bas kaam se
aisa kuchh ho jaa.e dil TuuTe nahin
sochiyega aap bhi aram se
mujh se puchho ansuon ki barkaten
mutma.in huun ranj-o-gham alam se
Leave a Reply