Poet
ye ashk yuun miri ankhon se kam nikalta hai
ghazal ke rang men raton men gham nikalta hai
nahin ki chashm-e-ghazal ko bhigo.e jaa.en ham
ki dil hi ro.e to phir sher nam nikalta hai
navazta hai vo kaghaz ko naghmagi ki rida
vafa ka zikr jo karne qalam nikalta hai
sitam-taraz tarashe sitam to kya gham hai
ki ab sitam bhi ba-tarz-e-karam nikalta hai
vo aur vaqt tha jab un se ras Tapakta tha
ki ab gulab labon se bhi sam nikalta hai
batao shahr men ḳhud sa kahan talash karun
jise bhi dekho vahi mohtaram nikalta hai
baḌha.i jaati hain is tarah dhaḌkanen dil ki
mire huzur hi zulfon men ḳham nikalta hai
ye kaun chand sa utra hai ḳhana-e-dil men
ki jis ko dekh andheron ka dam nikalta hai
ḳhushi manao ai ahl-e-ḳhirad ki ab to junun
tumhare shahr se su-e-adam nikalta hai
Leave a Reply