par-e-jibril bhi jis raah men jal jaate hain
ham vahan se bhi bahut duur nikal jaate hain
mahfil-e-dil ko hai mange ke ujale se gurez
diip daghon ke sar-e-sham hi jal jaate hain
saaf uḌ jaata hai ḳhasan-e-ḳharabat ka rang
ham vo mai-ḳhvar hain pi pi ke sambhal jaate hain
ik haqiqat hi haqiqat hai azal ho ki abad
vaise afsanon ke unvan badal jaate hain
dekhiye naqsh-e-kaf-e-pa-e-vafa ka e.ajaz
raste duudh ke manind ubal jaate hain
zindagi asl men ta.amir-e-mohabbat hai ‘hayat’
de ke ham dahr ko paigham-e-amal jaate hain
Leave a Reply