Asad Rizvi
tu bhi hairan-o-pareshan hai thaka huun main bhi
tere hamrah bahut duur chala huun main bhi
tu bhi us but ki ziyarat ka sharaf hasil kar
us ke qadmon pe ka.i baar jhuka huun main bhi
tu bhi masruf khilaunon men hai yadon se pare
ji ke bahlane ko kuchh DhunD raha huun main bhi
tera hi charcha nahin shahr men bazaron men
kitne aḳhbar-o-rasa.il men chhapa huun main bhi
log divana agar kahte hain to sach hai ‘asad’
apne baare men yahi soch raha huun main bhi
Leave a Reply