hasil davam kab hai bhala ab davam ko
ham ki taraste rahte hain un ke salam ko
nilam ho raha hai adab bhi adiib bhi
phaila.en shahr shahr men ab is payam ko
talvar ka vajud hai talvar-zan ke saath
me.aar mat bana.iye ḳhali niyam ko
be-shak ye baune ghalib-e-dauran kahen tumhen
main janta huun ḳhuub tumhare maqam ko
pahunchi hai ab zamir-faroshi uruuj par
ji chahta hai aag laga duun kalam ko
mufti adab ke diin ke mufti se kab alag
kaise halal karne lage hain haram ko
aari jo adl se ho adalat se duur ho
dozaḳh rasid kijiye aise imaam ko
e.azaz ab adab ka nahin chahiye mujhe
rakhiye muaaf bahr-e-ḳhuda is ghulam ko
ab naam par adab ke tijarat adab ki hai
‘safdar’ hava na dijiyega intiqam ko
Leave a Reply