Aah Hamraaz Kaun Hai Apna

aah hamraz kaun hai apna

bakht-e-na-saz kaun hai apna

kis ke kahlaen ham ki tere siva

but-e-tannaz kaun hai apna

baat kah de hai vo tah-e-dil ki

aisa ghammaz kaun hai apna

le udte tu hi gar na ham ko to phir

shauq-e-parvaz kaun hai apna

vasl hota nahin, nahin maalum

khalal-andaz kaun hai apna

bola dekh aaina vo hairat se

chehra-pardaz kaun hai apna

go ki ankhen ladaen ham us se

yaan nazar-baz kaun hai apna

shab-e-furqat men juz-dam-e-quliyan

yaar dam-saz kaun hai apna

be-niyazi kare jo tu hi to phir

ai hama-naz kaun hai apna

‘mushafi’ ham hain aur tanhai

sach hai ambaz kaun hai apna

Leave a Comment