Etizar

tum samajhti ho ye gul-dan men hanste hue phuul

meri afsurdagi-e-dil ko mita hi denge

ye hasin phuul ki hain jan-e-gulistan-e-bahar

mere soe hue naghmon ko jaga hi denge

tum ne dekhi hain damakti hui shamen lekin

tum ne dekhe nahin bujhte hue dipak hamdam

vahi dipak jo nigahon ka sahara pa kar

ek lamhe ke liye jalte hain bujh jaate hain

kabhi ik ashk se dhul jaate hain sadiyon ke ghubar

kaenat aur nikhar aur sanvar jaati hai

kabhi nakam tamanna ki sada-e-mub.ham

qahqaha ban ke fazaon men bikhar jaati hai

tutte taron ke sangit sune hain tum ne

vo bhi naghme hain jo honton se gurezan hi rahe

phad.phadate hue dekhe hain fazaon men kabhi

vo fasane jo nigahon se bayan ho na sake

kabhi kanton se bahal jaati hai ruh-e-ghamgin

aur maasum shagufon ki rasili ḳhushbu

neshtar ban ke rag-e-jan men utar jaati hai

haan yahi phuul yahi jan-e-gulistan-e-bahar

naag ban kar kabhi ehsas ko Das lete hain

Leave a Comment