main apni vafaon ka bharam le ke chali huun
hathon men mohabbat ka alam le ke chali huun
chalne hi nahin deti thi ik vaade ki zanjir
mushkil tha magar bar-e-sitam le ke chali huun
kya puchhte ho mujh se mire zad-e-safar ka
asbab men bas yad-e-sanam le ke chali huun
jis shahr ke har mod pe kante hi bichhe hain
is shahr men bhi zakhmi qadam le ke chali huun
koi bhi safar main ne adhura nahin chhoda
chalna hai to manzil ki qasam le ke chali huun
mujh ko hai yaqin harf ki hurmat pe hamesha
tanha thi magar apna qalam le ke chali huun
khush-bakht hai vo jis ke muqaddar men ‘iram’ hai
main saath men ik bagh-e-iram le ke chali huun
Leave a Reply