ankhon men jo basa tha vo kajal kahan gaya
tha zabt jis ke dam se vo badal kahan gaya
ham jis ke saath shauq se nikle the sair ko
vo ham-safar kahan hai vo jangal kahan gaya
karta tha shahr men jo mohabbat se guftugu
maalum hai kisi ko vo pagal kahan gaya
maujen bhi us ke paas uthin nazm-o-zabt se
sahil ki jaan tha jo vo dibal kahan gaya
phaili hui thi jis ke taqaddus ki raushni
ankhen talash men hain vo anchal kahan gaya
‘bano’ jo gham mila mujhe qismat se ab vahi
le kar kisi ki yad-e-musalsal kahan gaya
Leave a Reply