vo bastiyan vo baam vo dar kitni duur hain
mahtab tere chand-nagar kitni duur hain
vo ḳhvab jo ghubar-e-guman men nazar na aa.e
vo ḳhvab tujh se dida-e-tar kitni duur hain
bam-e-ḳhayal-e-yar se utre to ye khula
ham se hamare sham-o-sahar kitni duur hain
ai asman in ko jahan hona chahiye
us ḳhaak se ye ḳhak-basar kitni duur hain
baiThe biTha.e dil ke safar par chale to aa.e
lekin vo mehrban-e-safar kitni duur hain
ye bhi ghazal tamam hui shaam ho chuki
afsun-e-sha.iri ke hunar kitni duur hain
Leave a Reply