ham ne is dhuup se amaañ ke liye
jism taane haiñ sā.ebāñ ke liye
aañkh manzar se āshnā hī nahīñ
lafz DhūñDe haiñ phir zabāñ ke liye
mujh pe pheñke ga.e the jo patthar
maiñ ne rakkhe haiñ vo makāñ ke liye
ḳhud-farebī to ab nahīñ mumkin
ḳhvāb dekhe haiñ bas jahāñ ke liye
ham jo bheje ga.e haiñ duniyā meñ
ek ta.ana haiñ āsmāñ ke liye
koī ḳhvāhish adhūrī rah jaa.e
koī hiila ho ab fuġhāñ ke liye
jin kī manzil unheñ mayassar ho
vo nikalte haiñ phir kahāñ ke liye
ham udāsī kī ik shabīh haiñ ab
isti.āra haiñ ham ḳhizāñ ke liye