Sabahat Urooj
ham ne is dhuup se amaan ke liye
jism taane hain sa.eban ke liye
aankh manzar se ashna hi nahin
lafz DhunDe hain phir zaban ke liye
mujh pe phenke ga.e the jo patthar
main ne rakkhe hain vo makan ke liye
ḳhud-farebi to ab nahin mumkin
ḳhvab dekhe hain bas jahan ke liye
ham jo bheje ga.e hain duniya men
ek ta.ana hain asman ke liye
koi ḳhvahish adhuri rah jaa.e
koi hiila ho ab fughan ke liye
jin ki manzil unhen mayassar ho
vo nikalte hain phir kahan ke liye
ham udasi ki ik shabih hain ab
isti.ara hain ham ḳhizan ke liye
Leave a Reply