dekhna husn-e-talab kya mangne aaya huun main
ik mohabbat ki nazar bas pyaar ka bhuka huun main
apni hasti ki ḳhabar hai janta huun kya huun main
ek musht-e-ḳhak huun simTa hua sahra huun main
jis ke ik jalve ne divana banaya hai mujhe
us but-e-bedad-gar ko DhunDhta phirta huun main
aap ne apna liya to vasta duniya se kya
meri duniya aap hain aur aap ki duniya huun main
ghair to kahte rahenge ḳhair jaane dijiye
Thiik kahte hain bura huun kya kahun achchha huun main
raat din jo atish-e-furqat men jalta huun ‘kanval’
ḳhuub un ki bevafa.i ka maza leta huun main
Leave a Reply