sharm-alud kahin dida-e-ghammaz na ho
dilbari ka koi pahlu nazar-andaz na ho
duur se dard-bhari ek sada aati hai
mere TuuTe hue dil ki kahin avaz na ho
lazzat-e-dard ka mahjur sahara kyuun len
lutf-e-tanha.i to jab hai koi dam-saz na ho
shukr sad shukr ki ai shauq mira ta.ir-e-dil
bal-o-par hote hue ma.il-e-parvaz na ho
muntazir bazm hai aa jaa.en ba-sad ishva-e-naz
shart ye hai ki nigah-e-ghalat-andaz na ho
ye bhi kya daur hai nairangi-e-alam tera
murgh-e-asuda chaman zamzama-e-parvaz na ho
kasrat-e-jalva men gum hai dil hangama-faroz
be-ḳhudi kahti hai mera koi hamraz na ho
sar-e-maqtal koi is shaan se aa.e ai ‘shauq’
lab pe e.ajaz na ho chashm fusun-saz na ho
Leave a Reply