Ehsan Danish
jo le ke un ki tamanna ke ḳhvab niklega
ba-ijz-o-shauq ba-hal-e-ḳharab niklega
jo rang baanT ke jaata hai tinke tinke ko
adu zamin ka yahi aftab niklega
bhari hui hai ka.i din se dhund galiyon men
na jaane shahr se kab ye azaab niklega
jo de rahe ho zamin ko vahi zamin degi
babul bo.e to kaise gulab niklega
abhi to sub.h hui hai shab-e-tamanna ki
bahenge ashk to ankhon se ḳhvab niklega
mire gunah bahut hain magar taqabul men
usi ka lutf-o-karam be-hisab niklega
mila kisi ko na ‘danish’ kuchh aarzu ke ḳhilaf
pas-e-fana bhi yahi intiḳhab niklega
Leave a Reply