Sultan Akhtar
pas-e-ghubar-e-talab ḳhauf-e-justuju hai bahut
rafiq-e-rah magar un ki aarzu hai bahut
laraz ke TuuT hi jaa.e na aaj barg-e-badan
lahu men qurb ki garmi ragon men lu hai bahut
ulajh gaya hai vo ḳhvahish ke jaal men ya.ani
fareb-e-rang-e-havas ab ke du-ba-du hai bahut
kaTa-phaTa sahi malbus-e-kohnagi na utaar
tire liye yahi divar-e-abru hai bahut
mizaj-e-vaqt ki tasvir ban ga.e ham log
labon pe barf jami hai dilon men lu hai bahut
hara-bhara nazar aata hai yuun to vo ‘aḳhtar’
dayar-e-dil men magar qaht-e-rang-o-bu hai bahut
Leave a Reply