Kya KHabar Thi Ek Din Ye Hadisa Ho Jaega

Ejaz Ansari

kya ḳhabar thi ek din ye hadisa ho ja.ega

umr bhar chaha jise vo bevafa ho ja.ega

ho agar azm-e-musammam ḳhvahish-e-manzil ke saath

raah ka patthar bhi ik din rahnuma ho ja.ega

is qadar baḌhne lagi hai har taraf aludgi

saans lena aadmi ka mas.ala ho ja.ega

zindagi bhar saath chalne ki jo khata hai qasam

dekhna vo raste hi men juda ho ja.ega

ab tumhara koi ḳhat koi ḳhabar milti nahin

aise aalam men to jiina bhi saza ho ja.ega

sar uThate hain yahan bhi asr-e-hazir ke yazid

kal ye ḳhitta bhi mahaz-e-karbala ho ja.ega

kuchh na kuchh ‘ejaz’ naghme likh vatan ke naam par

is tarah se sha.iri ka haq ada ho ja.ega