logon ke paas dard ki daulat nahin rahi
ya.ani kisi ko koi zarurat nahin rahi
masruf is qadar kiya us ki talash ne
mujh ko to ḳhud se milne ki fursat nahin rahi
duniya ne harf harf men taqsim kar diya
ab zindagi kisi se ibarat nahin rahi
achchha hua ki tark-e-ta.alluq hi kar liya
ankhon ko intizar ki zahmat nahin rahi
main kya karun dimagh ne taḳhta ulaT diya
ab dil pe dost teri hukumat nahin rahi
gum ho ga.e hain saare saliqe vafaon ke
ab is jahan men rasm-e-mohabbat nahin rahi
rusva.iyon ne ghar ki vo sar hi jhuka diya
yuun shahar men vo unchi imarat nahin rahi
‘ruḳhsar’ muflisi ke karishme ajiib hain
ghurbat men dosti bhi salamat nahin rahi
Leave a Reply