Shariq Kaifi
ḳhvab vaise to ik inayat hai
aankh khul jaa.e to musibat hai
jism aaya kisi ke hisse men
dil kisi aur ki amanat hai
jaan dene ka vaqt aa hi gaya
is tamashe ke ba.ad fursat hai
umr bhar jis ke mashvaron pe chale
vo pareshan hai to hairat hai
ab sanvarne ka vaqt us ko nahin
jab hamen dekhne ki fursat hai
us pe utne hi rang khulte hain
jis ki ankhon men jitni hairat hai
Leave a Reply