ek arz-e-mudda.a hone se pahle
soch lena tha ḳhuda hone se pahle
ḳhvahishen kitni adhuri rah ga.i hain
jism o jaan men fasla hone se pahle
aḳhiri tahrir hai ab-e-ravan par
aḳhiri bosa qaza hone se pahle
is qadar miTha na hona chahiye tha
un labon ko za.iqa hone se pahle
us ki ankhon ke piyale nachte hain
kho ga.e kitne nasha hone se pahle
kaun jaane Dubna hai ya ubharna
paniyon men rasta hone se pahle
ḳhud-kushi kar li chamakte chand ne bhi
aḳhir-e-shab aa.ina hone se pahle
shahr se shadan guzar jaana hai behtar
mushta.il ab-o-hava hone se pahle
vo makin-e-dil hua ḳhurshid-‘akbar’
ghar ka darvaza khula hone se pahle
Leave a Reply