poet

Kis Ki Khoi Hui Hansi Thi Main

kis ki khoi hui hansi thi main

kis ke honton pe aa gai thi main

kin zamanon pe munkashif hui huun

kin zamanon ki raushni thi main

main kisi shakhs ki udasi thi

sard lahje men bolti thi main

din Dhale lautte parindon ko

ghar ki khidki se dekhti thi main

kaash ik baar dekh lete tum

raste men padi hui thi main

ab jo afsurdagi ki chadar huun

mausam-e-gul ki odhni thi main

khud ko daryaft karne nikli huun

yaani khud se kahin khafi thi main

gungunata tha shab ke pichhle pahar

jaane kis dil ki ragni thi main

phir december tha sard raten thiin

shahr sota tha jagti thi main

us ne jab haath haath par rakkha

surkh phulon se bhar gai thi main

aaj dekha tha aaina main ne

aur phir der tak hansi thi main

jaane kya baat yaad aai mujhe

hanste hanste jo ro padi thi main

main ne ik shaam pa liya tha use

us se ik raat kho gai thi main

janta kaun mujh ko mere siva

ghar ke andar bhi ajnabi thi main

meri parten nahin khulin ab tak

devtaon ki shairi thi main

khud se takra gai thi ‘janan’ kahin

apne raste men aa gai thi main

More Poems

Leave a Comment