jaate hue nigah idhar kar ke dekh lo
ham log phir kahan hamen ji-bhar ke dekh lo
deta hai ab yahi dil-e-shorida mashvara
jiine se tang ho to miyan mar ke dekh lo
rahne ka dasht men bhi saliqa nahin gaya
yaan bhi qarine saare mire ghar ke dekh lo
shahan-e-kaj-kulah zamin-bos ho ga.e
tevar magar vahi hain mire sar ke dekh lo
sajde men do-jahan hain ai ‘dil’ hamare saath
rutbe ye astan qalandar ke dekh lo
Leave a Reply