insha-allah-khan-insha

Kya Bhala Shaikh-Ji The Dair Mein Thode Patthar

kya bhala shaikh-ji the dair men thode patthar

ki chale kaaba ke tum dekhne rode patthar

ai basa kohna imarat-e-maqabir jin ke

logon ne chob-o-chagal ke liye tode patthar

jaao ai shaikh o barahman haram-o-dair ko tum

bhaai bezar hain ham ham ne ye chhode patthar

kabhi dil-ha-e-butan tujh se pasijen ai ashk

to ye ham janen ki bas tu ne nichode patthar

na chire nok se nashtar ke ayazam-billah

koi ushshaq ke the chhati ke phode patthar

kos baithen fuqara ahl-e-duval ko to abhi

un ke hathi hon pahad aur ye ghode patthar

gar sag-e-gursina le shuum ke matbakh ki baas

to bhala haDDi ki ja kya vo bhanbode patthar

na hinsa main jo hansane se shab un ki to kaha

tujhe qurban karun haae nigode patthar

ek ghazal aur suna de hamen ‘insha’ har-chand

tu ne is men bhi kisi Dhab ke na chhode patthar

More Poems

Leave a Comment