Wali Alam Shaheen
qubul hai gham-e-duniya tire havale se
ye bojh varna sambhalta nahin sambhale se
suragh apna udhar hi kahin mile shayad
tane hue hain jidhar makḌiyon ke jaale se
main ek zarra-e-avara aur miri ḳhatir
samundaron si ye raten ye din himale se
khuli to rakhta huun main ghar ki khiḌkiyan lekin
vahi tamam nazare hain dekhe-bhale se
kisi ki yaad bhi unvan-e-bevafa.i thi
paḌe hain paanv men qabl-e-safar bhi chhale se
sukun kitna hai ji ko ye soch kar ki hamen
haram se koi ilaqa na ab shivale se
ye kam nahin ki main us ki dua men shamil huun
kuchh aur chahiye kya duur jaane vaale se
Leave a Reply