deta huun dil jise vo kahin bevafa na ho
ye ishq mere vaste shayad qaza na ho
duur apne dar se tum na karo ai sanam use
jis ko zara jahan men kahin aasra na ho
rahat se mujh ko niind to aai mazar men
pahlu ko mere chiir ke dil chal basa na ho
marne ke baad bhi yahi dhadka raha kya
mil kar saba se khaak hamari hava na ho
shikva karun to yaar ka pur-khauf hai yahi
nazuk mizaj hai vo ye sun kar khafa na ho
parde se dil ke baat jo karta hai mujhe se ab
aata hai ye khayal kahin khud khuda na ho
rangat hai zard rukh ki to khushki labon par hai
asar ishq ke hain kahin dil laga na ho
mar ja.un ai ‘jamila’ agar ishq-e-ghaus men
mumkin nahin ki khak-e-lahad kimiya na ho