Syed Sarosh Asif
ham-safar ban ke agar saath bhanvar ja.enge
naḳhuda ham tiri kashti se utar ja.enge
DhunD ke laao unhen jo ye kaha karte the
vaqt ke saath ye halat sudhar ja.enge
jin ko kashti men biThaya tha tavazun ke liye
ab ye kahte hain ki raste men utar ja.enge
azmane men koi harj nahin duniya ko
haa.e kuchh log magar dil se utar ja.enge
donon lashon ki hatheli pe yahi misra tha
dekhna ishq men ham had se guzar ja.enge
kya banega mire shanon ke farishton ka ‘sarosh’
main to mar ja.unga ye donon kidhar ja.enge
Leave a Reply