Masoom Ansari
mohabbat ke safar men be-ruḳhi se choT lagti hai
jise ham pyaar karte hain usi se choT lagti hai
zarurat se ziyada guftugu achchhi nahin lagti
zarurat se ziyada ḳhamushi se choT lagti hai
mujhe be-ḳhvab raton se koi shikva nahin phir bhi
andhera Dasta hai aur chandni se choT lagti hai
shikasta aur suuni khiḌkiyan avaze kasti hain
guzarta huun main jab is ki gali se choT lagti hai
tumhare saath bhi aisa ho to hairan mat hona
kisi se milti hai rahat kisi se choT lagti hai
yahan sab apni fitrat ke sabab pahchane jaate hain
shikari zehniyat ko sadgi se choT lagti hai
kabhi hairan rah jaata huun zalim ki jasarat par
kabhi ‘ma.asum’ apni buzdili se choT lagti hai
Leave a Reply