baad-e-murdan ki bhi tadbir kiye jaata huun
apni qabr aap hi taamir kiye jaata huun
chain mutlaq nahin padta shab-e-hijran men mujhe
subh tak nala-e-shab-gir kiye jaata huun
afv par afv ki rezish hai udhar se har dam
aur main taqsir pe taqsir kiye jaata huun
us ke kuche men jo dekhega karega mujhe yaad
apni surat ki main tasvir kiye jaata huun
uth ke ta-kucha-e-laila se na jaave ye kahin
paanv men qais ke zanjir kiye jaata huun
koi le jaae ise ya ki na le jaae pa main
nama-e-shauq ki tahrir kiye jaata huun
us ka kya jurm mire hosh gae hain kaise
jo alam ghair pe shamshir kiye jaata huun
pesh jaati nahin yuun bhi miri us se har-chand
sharr-o-makr-o-fan-o-tazvir kiye jaata huun
naqsh-e-hub chaal se nikal hai miri is khatir
main pari-zadon ki taskhir kiye jaata huun
‘mushafi’ yaar tu sunta nahin aur vahshi sa
haal ki apne main taqrir kiye jaata huun
Leave a Reply