yuun khabar kise thi meri tiri mukhbiri se pahle
main masarraton men gum tha tiri dosti se pahle
tire husn ne jagaya mere ishq-e-be-baha ko
tiri justuju kahan thi mujhe shairi se pahle
tu sharik-e-zindagi hai main huun gham-gusar tera
tera gham raha hai shamil meri har khushi se pahle
de agar mujhe ijazat jo mira zamir mujh ko
main tujhe khuda bana luun tiri bandagi se pahle
tire husn ki kahani mire ishq ka fasana
bahut aam ho chuka hai gham-e-ashiqi se pahle
tujhe rahnuma bana kar mujhe mil gai hai manzil
main bahut bhatak raha tha tiri rahbari se pahle
kaho mir-e-karvan se mujhe is tarah na dekhe
main bada farakh-dil tha kabhi dil-lagi se pahle
ye mata-e-ranj-o-gham aur shab-e-hijr ka ye ‘alam’
tha kahan mira muqaddar tiri be-rukhi se pahle
Leave a Reply