Tu Kisi Aur Ki Hai Baat Ye Sochi to Na Thi

Hasnain Aqib

tu kisi aur ki hai baat ye sochi to na thi

bevafa.i tiri aadat sahi achchhi to na thi

har saheli tiri karti rahi jis ki tarif

tere hathon pe lahu tha mira mehndi to na thi

tu jo aaya to mire chehre pe lauTi raunaq

tujh se pahle miri halat kabhi aisi to na thi

teri yadon ki kasak hai ki baḌhi jaati hai

ye hava raat tiri samt se guzri to na thi

jaane kyon tu use karta raha barbad sada

vo jo ik dil tha mira vo koi dehli to na thi

chhoḌ kar jis ko tiri samt chala aaya huun

tujh se achchhi thi vo lekin tire jaisi to na thi

kaifiyat us ki na dekhi ga.i ham se ‘aqib’

maslahat yuun kabhi bazar men baiThi to na thi