din ko din raat ko main raat na likhne pa.un
un ki koshish hai ki halat na likhne pa.un
hindu ko hindu musalman ko likkhun muslim
kabhi in donon ko ik saath na likhne pa.un
bas qalam-band kiye ja.un main un ki har baat
dil se jo uThti hai vo baat na likhne pa.un
soch to leta huun kya likhna hai par likhte samay
kanpte kyuun hai mire haath na likhne pa.un
jiit par un ki laga duun main qasidon ki jhaḌi
maat ko un ki magar maat na likhne pa.un
shukr hi shukr likhe ja.un main un ke haq men
kabhi un se main shikayat na likhne pa.un
apne honTon pe na la pa.un main apne naale
apni hi ankhon ki barsat na likhne pa.un
jin savalon se tabassum men ḳhalal paḌta ho
kabhi vo talḳh savalat na likhne pa.un
ḳhud ko maazi men rakhun haal men rahte hue bhi
na.e vaqton ke ḳhayalat na likhne pa.un
un ki koshish hai kaleja ho mira patthar ka
un ki koshish hai main jazbat na likhne pa.un
Leave a Reply