ab ‘mir’-ji to achchhe zindiq hi ban baithe
peshani pe de qashqa zunnar pahan baithe
azurda dil-e-ulfat ham chupke hi behtar hain
sab ro uthegi majlis jo kar ke sukhan baithe
uryan phiren kab tak ai kaash kahin aa kar
ta gard bayaban ki bala-e-badan baithe
paikan-e-khadang us ka yuun siine ke udhar hai
jon mar-e-siyah koi kadhe hue phan baithe
juz khat ke khayal us ke kuchh kaam nahin ham ko
sabzi piye ham aksar rahte hain magan baithe
shamshir-e-sitam us ki ab go ka chale har-dam
shorida-sar apne se ham bandh kafan baithe
bas ho to idhar-udhar yuun phirne na den tujh ko
na-char tire ham ye dekhen hain chalan baithe