ankhon men chubh rahi hai guzarti ruton ki dhuup
jalva dikha.e ab to na.e mausamon ki dhuup
sham-e-firaq guzre to suraj tulua ho
dil chahta hai phir se vahi qurbaton ki dhuup
is men tamazaten bhi sahi shiddaten to hain
ulfat ki chhanv se hai bhali nafraton ki dhuup
main us ke vaste huun baharon ki chandni
us ka vajud mere liye sardiyon ki dhuup
mahrumi-e-visal hai ‘nasir’ mujhe qubul
is par magar paḌe na kabhi gardishon ki dhuup
Leave a Reply