nik.hat-o-rang na mausam ki hava Thahri hai
gul ki qismat men ba-har-hal fana Thahri hai
zaḳhm-e-dil khil uThe hanste hue phulon ki tarah
ek lamhe ko jahan bad-e-saba Thahri hai
maut ko kahiye ilaj-e-gham-e-hasti lekin
zindagi kaun se jurmon ki saza Thahri hai
aur mansur koi mash.had-e-hasti men na tha
la.eq-e-dar jo ik meri ana Thahri hai
husn-e-muḳhtar hai har baat rava hai is ko
fitrat-e-ishq to paband-e-vafa Thahri hai
koi naghma koi jhankar koi hosh-ruba
dil hi bahla len tabi.at jo zara Thahri hai
Leave a Reply