Ibrahim Ashk
mish.al-ba-kaf kabhi to kabhi dil-ba-dast tha
main sail-e-tirgi men tajalli-parast tha
har ik kamand arsa-e-afaq hi pe thi
lekin buland jitna hua utna past tha
thi hausle ki baat zamane men zindagi
qadmon ka fasla bhi yahan ek jast tha
bikhre hue the log ḳhud apne vajud men
insan ki zindagi ka ajab bandobast tha
marne ke ba.ad azmat o shohrat se fa.eda
lekin jahan tamam hi murda-parast tha
sarmaya-e-hayat the kuchh naqd-e-dagh-e-dil
sach baat to hai ye ki bahut tang-dast tha
arz-e-niyaz-e-shauq se tha be-niyaz dil
mulk-e-havas men ‘ashk’ akela hi mast tha
Leave a Reply