Arshad Abdul Hamid
shart-e-divar-o-dar-o-bam uTha di hai to kya
qaid phir qaid hai zanjir baḌha di hai to kya
ab bhi tan tegh se laḌ jaa.e to chhan bolta hai
vaqt ne is pe agar dhuul jama di hai to kya
mere ḳhusrav ne mujhe gham bhi ziyada baḳhsha
daulat-e-ishq agar mujh ko siva di hai to kya
ham bhi tayyar hain phir jaan luTane ke liye
samne phir vahi kuufa vahi vaadi hai to kya
mujrim-e-dil ko kahan faisla sunne ka dimagh
us ne baḳhsha hai to kya aur saza di hai to kya
Leave a Reply