Shart-E-Diwar-O-Dar-O-Baam uTha Di Hai to Kya

shart-e-dīvār-o-dar-o-bām uThā dī hai to kyā

qaid phir qaid hai zanjīr baḌhā dī hai to kyā

ab bhī tan teġh se laḌ jaa.e to chhan boltā hai

vaqt ne is pe agar dhuul jamā dī hai to kyā

mere ḳhusrav ne mujhe ġham bhī ziyāda baḳhshā

daulat-e-ishq agar mujh ko sivā dī hai to kyā

ham bhī tayyār haiñ phir jaan luTāne ke liye

sāmne phir vahī kuufa vahī vaadī hai to kyā

mujrim-e-dil ko kahāñ faisla sunñe kā dimāġh

us ne baḳhshā hai to kyā aur sazā dī hai to kyā

Leave a Comment