Zakir Khan Zakir
uruuj us ke liye tha zaval mere liye
nazar nazar men raha ik saval mere liye
haqiqaten sabhi mansub un ke namon se
sarab ḳhvab tasavvur ḳhayal mere liye
main ik parinda huun masruf-e-rizq ki ḳhatir
udhar hain ahl-e-nasheman niDhal mere liye
dayar-e-ghair men sham-o-sahar aziyyat hai
dayar-e-dil men Thaharna muhal mere liye
main apne hisse ki furqat ke ba.ad a.unga
zara saliqe se ḳhud ko sambhal mere liye
vo muntazir tha sharab-e-nazar liye ‘zakir’
ghaTa ne khol ke rakkhe the baal mere liye
Leave a Reply