jalva paband-e-nazar bhi hai nazar-saz bhi hai
parda-e-raz bhi hai parda-dar-e-raz bhi hai
ham-nafas aag na lag jaa.e kahin mahfil men
shola-e-saz bhi hai shola-e-avaz bhi hai
yuun bhi hota hai mudava-e-gham-e-mahrumi
jabr-e-sayyad bhi hai hasrat-e-parvaz bhi hai
mere afkar ki rana.iyan tere dam se
meri avaz men shamil tiri avaz bhi hai
zindagi zauq-e-numu zauq-e-talab zauq-e-safar
anjuman-saz bhi hai garm-e-tag-o-taz bhi hai
mere afkar-o-ḳhayalat men saari ‘taban’
husn-e-dilli bhi hai rana.i-e-shiraz bhi hai
Leave a Reply